(गणपतीपुळे / वैभव पवार)
कोकणातील फळांचा राजा असलेला हापूस आंबा यंदा आता अनेक ठिकाणी दिसून येत असतानाच रत्नागिरी तालुक्यातील वरची निवेंडी येथील प्रगतशील शेतकरी उल्हास पिंपुटकर यांच्या आंबा बागेत अवघ्या एक वर्षाच्या झाडावर रत्नागिरी हापूस लगडला आहे. ही किमया वरची निवेंडी येथील प्रगतीशील कष्टाळू शेतकरी उल्हास पिंपुटकर यांनी आपल्या अपार मेहनत व चाणाक्ष बुद्धीने केली आहे.
वरची निवेंडी या ठिकाणी राहणाऱ्या उल्हास पिंपुटकर यांच्या आंबा नर्सरीत या वर्षी निसर्गाच्या लहरीपणामुळे आंबा उत्पादन अगदी कमी आहे. आंबामोहर भरपूर यावा, पिक भरपूर चांगले यावे, म्हणून संजीवके, रासायनिक, ऑरगॅनिक, वेगवेगळी खते वापरली जातात. तरी सुद्धा अपार मेहनत घेऊन यंदा पिक फार कमी आहे. आंबा बागायतदार त्रस्त आहेत. यातूनच कोणतेही संजीवक, खत न वापरता आलेल्या मोहराचे निरीक्षण करून कटींग करुन आपल्या बुद्धीने एक वर्षाच्या झाडावर आंबा लागण्याची कीमया करुन दाखवली.
कोकणात एक म्हण प्रचलित आहे की, आजोबांनी झाड लावायचे अन् नातवाने आंबे काढायचे, एकूणच, हीच म्हण उल्हास पिंपुटकर यांनी मागे टाकली असल्याचे मत व्यक्त होत आहे. शिवाय त्यांच्या चाणाक्ष बुद्धीचे विशेष कौतुक केले जात आहे.
