( संगमेश्वर )
संगमेश्वर तालुक्यातील तळेकांटे येथे शुल्लक कारणावरून अंगावर धावत जात लाथाबुक्क्यांनी मारहाण करून महिलेच्या मांडीला चावा घेतल्याची घटना 9 जानेवारी रोजी सायंकाळी 4.30 वा. च्या सुमारास घडली. याबाबतची फिर्याद श्रुती सुरेंद्र भागवत (28, तळेकांटे, नवीन वसाहत, संगमेश्वर) यांनी येथील पोलीस स्थानकात दिली.
श्रुती भागवत या घराच्या अंगणात बसलेल्या असताना शेजारी राहणाऱ्या उमा केतकर (50) यांनी काही कारण नसताना श्रुती याना शिवीगाळ केली. तुम्ही शिवीगाळ कोणाला करता असे श्रुती यांनी विचारले असता अंगावर धावत जात पुन्हा शिवीगाळ केली. हे भांडण पाहून उमा केतकर यांचा मुलगा राहुल केतकर (27) याने रागाच्या भरात श्रुती याना बुक्क्यांनी मारहाण करून त्यांच्या मांडीला चावा घेतला. यात त्यांच्या मांडीला दुखापत झाली.
याप्रकरणी श्रुती भागवत यांनी संगमेश्वर पोलीस स्थानकात तक्रार दाखल केल्यानंतर उमा केतकर, राहुल केतकर यांच्यावर भादंवी कलम 324, 352, 504, 506,34 अन्वये गुन्हा दाखल करण्यात आला आहे.
