(चिपळूण)
एसटी थांब्यावर उभ्या असलेल्या एका प्रवाशाला आयशर टेम्पोने धडक दिल्याची घटना शुक्रवारी (२९ सप्टेंबर) मुंबई-गोवा महामार्गावरील कोंडमळा निवाचीवाडी येथे घडली. याप्रकरणी टेम्पो चालकावर सावर्डे पोलिस स्थानकात गुन्हा दाखल करण्यात आला आहे.
रज्जाक गफुर शिरगावकर असे टेम्पो चालकाचे नाव आहे. याबाबत प्रमोद यशवंत मेस्त्री यांनी फिर्याद दिली आहे. त्यांचे वडील यशवंत सखाराम मेस्त्री अपघातात जखमी झाले आहेत. प्रमोद मेस्त्री वडिलांसह सावर्डे बाजारपेठेत खरेदीकरिता जात होते. यासाठी ते कोंडमळा निवाचीवाडी येथील एसटी थांबा येथे उभे होते.
त्याचवेळी सावर्डेकडून चिपळूणकडे जाणाऱ्या आयशर टेम्पो (जीए ०४, टी ७०४२) चालक रज्जाक शिरगावकर घेऊन जात होता. त्याने प्रमोद व यशवंत मेस्त्री उभ्या असलेल्या दिशेला जाऊन यशवंत मेस्त्री यांना धडक दिली. यात ते जखमी झाले आहेत. या अपघातानंतर टेम्पो चालक न थांबता पळून गेला. याप्रकरणी त्याच्यावर गुन्हा दाखल करण्यात आला आहे.
