( रत्नागिरी / प्रतिनिधी )
रत्नागिरी तालुक्यातील कुर्धे येथे दोन दुचाकींच्या धडकेत तिघेजण जखमी झाल्याची घटना बुधवार 5 नोव्हेंबर रोजी सायंकाळी 6.45 वाजण्याच्या सुमारास घडली. या अपघाताची नोंद पुर्णगड पोलिस स्थानकात करण्यात आली आहे. या अपघातात साईप्रसाद दीपक चव्हाण (26, पूर्णगड, बाजारकरवाडी, रत्नागिरी), राज संजय तोडणकर (25, कुर्ली, भाटये, रत्नागिरी), हर्षदा शैलेंद्र चव्हाण (22, कारवांचीवाडी, रत्नागिरी) अशी जखमी झालेल्या तिघांची नावे आहेत.
पोलिसांनी दिलेल्या माहितीनुसार साईप्रसाद चव्हाण हा आपल्या ताब्यातील टीव्हीएस एन्टॉर दुचाकीवरुन जात असताना कुर्धे येथील नामदेव स्टॉप जवळ आला असता निष्काळजीपणे गाडी चालवून विरुध्द दिशेला जावून दुसऱ्या दुचाकीला धडक दिली. या मध्ये साईप्रसाद याच्यासह दुसऱ्या दुचाकीवरील राज तोडणकर व त्याची मैत्रिण हर्षदा चव्हाण असे एकूण तिघेजण जखमी झाले. साईप्रसाद याने निष्काळजीपणे गाडी चालवून दोघांच्या दुखापतीस कारणीभूत ठरल्याप्रकरणी पूर्णगड पोलीस स्थानकात भादविकलम 279, 337, 338 मोटर वाहन कायदा कलम 184 नुसार गुन्हा दाखल करण्यात आला आहे.
