रिक्षा विहिरीत पडल्याने तिघांचा मृत्यू
(पुणे)
पुणे जिल्ह्यातील सासवड येथे रिक्षा अपघातात नवदाम्पत्यासह एका तरुणीचा मृत्यू झाला आहे. लग्नानंतर नवदाम्पत्य देवदर्शनाला जेजुरीला जात असताना हा अपघात घडला असून या घटनेने हळहळ व्यक्त करण्यात येत आहे.
याबाबत माहिती अशी की, पुण्याच्या धायरीहून जेजुरी येथे देवदर्शनासाठी चाललेल्या नवदाम्पत्याला घेऊन जाणारी रिक्षा सासवडजवळ विहिरीत पडली. त्यात नवदाम्पत्यासह एका तरुणीचा मृत्यू झाला. तर ड्रायव्हरसह एकाला वाचवण्यात पोलिसांना यश आले आहे.
पुण्यातील धायरी येथून खंडोबाचे दर्शन घेण्यासाठी चाललेल्या नवविवाहितांची रिक्षा सासवडनजीक बोरावके मळा येथे रस्त्याच्या कडेला असलेल्या विहिरीमध्ये पडली. अपघात कसा झाला याबाबत माहिती मिळाली नाही. सोमवारी रात्री आठच्या सुमारास ही घटना घडली.
आज सकाळी व्यायामाला जाणा-या मुलांना विहिरीतून वाचवा, वाचवा असे कोणीतरी ओरडल्याचा आवाज आला. त्यांनी त्या ठिकाणी जाऊन पाहिले असता दोन व्यक्ती त्यांना त्या विहिरीत दिसल्या आणि यानंतर ही माहिती सासवड पोलिसांना देण्यात आली. सासवड पोलिसांनी दोघांना सुखरूप बाहेर काढले आहे. मात्र नवविवाहित जोडपे आणि एका तरुणीचा यामध्ये दुर्दैवी मृत्यू झाला.
