तेजा मुळ्ये, रत्नागिरी
आयुष्यात येणाऱ्या अनेक नात्यांपैकी एक मैत्र हे नातं! मित्र असो मैत्रीण असो, जिथे मित्र जडत तिथे त्याशिवाय अन्य काही नसतं. निखळ मैत्री हा एक सुख, समाधान ,आनंद देणारा ठेवा आहे. प्रत्येक वयातील मैत्रीला एक वेगळा पोत असतो. आपल्याला भावणाऱ्या गोष्टी वेगळ्या असतात. खऱ्या मैत्रीमध्ये माझं तुझं, अस काही नसतं, संकोच नसतो, चढाओढ नसते , हक्क असतो पण अधिकार नसतो एकमेकांसाठी ठेवलेली परस्पर स्पेस त्यातच मैत्रातला गाभा असतो. त्या स्पेसचा शोध ज्या मैत्रांना लागला त्यांना आयुष्यातील आनंद मिळाला अस म्हणता येईल.तुम्हाला आवडणारी गोष्ट मैत्रीत केली जात नाही असं जाणवलं तर त्यासाठी समोरच्याची अडचण, समस्या असेल हा विश्वास ठेवला जातो ते मैत्र! काय समस्या वगैरे भाग त्यापुढे, प्रथम समजून घेणे आणि विश्वास ठेवणे होणे महत्त्वाचे. सोबत होणं महत्वाचं, आधार शब्द आला की देणे घेणे आले ते नकोच , असणे एव्हढीच भावना पुरेशी. हे माझे विचार सापेक्ष आहेत. प्रत्येकाला असेच वाटेल अस नाही पण म्हणूनच हा सहज संवाद! आता वाढत्या वयात तर प्रत्येकाला मैत्र संकल्पना चिकटलेली कुठेतरी असावी. जिथे मैत्र आहे तिथे तुमचं प्रतिबिंब उमटणारा आरसा आहे. प्रतिक्रिया उमटणारा रव आहे.मन समजून घेणारा टिपकागद आहे. सोबतीची ऊब आहे. आपला आवाज ऐकणारा कान आहे.
मैत्र आयुष्यात संगीत तयार करत, मैत्र रागाला आरोह अवरोह आहेत. चीज आळवण्याची ताकद आहे , साथ- संग रहाण्याची धुंदी आहे. जीवनात अखेरपर्यंत वास्तव वा स्मृती रूपाने ऐकू येणारे स्वर हाच जीवनाधार आहे!
