(रत्नागिरी)
रत्नागिरी तालुक्यातील भोके आंंबेकरवाडी रेल्वेस्टेशन फाटा येथे रिक्षावर माकडाने उडी मारल्याने रिक्षा पलटी होवून चालक ठार तर 2 जण जखमी झाल्याचे समोर आले आहे. ही घटना 29 मार्च रोजी सायंकाळी 5.15 वा. च्या सुमारास घडली. मंगेश तानाजी आंबेकर (47) असे मृत झालेल्या रिक्षा चालकाचे नाव आहे.
पोलिसांनी दिलेल्या माहितीनुसार, मंगेश तानाजी आंबेकर (47, भोके आंबेकरवाडी) हे आपल्या ताब्यातील रिक्षातून प्रवासी घेवून आंबेकरवाडी ते भोके बौध्दवाडी असे जात होते. याच दरम्यान भोके रेल्वेस्टेशन फाटयावर आले असता अचानक माकडाने रिक्षावर उडी घेतल्याने आंबेकर यांचा रिक्षावरील ताबा सुटला. रिक्षा रस्त्यावर पलटी झाली. या अपघातात रिक्षा चालक मंगेश आंबेकर यांचा जागीच मृत्यू झाला. तर रिक्षामधील अरुण गंगाराम सावंत (52), अल्पना अरुण सावंत (50, दोन्ही रा. भोके बौध्दवाडी) अशी दोन जखमींची नावे आहेत.
याबाबतची फिर्याद दीपक आंबेकर (35, भोके आंबेकरवाडी) यांनी रत्नागिरी ग्रामीण पोलीस स्थानकात दिली. त्यानुसार मयत रिक्षा चालक मंगेश आंबेकर यांच्यावर भादविकलम 304 (अ), 279, 337, 338 मोटर वाहन कायदा कलम 184 नुसार गुन्हा दाखल करण्यात आला आहे. अधिक तपास पोलीस निरीक्षक जगताप करत आहेत.
