(नवी दिल्ली)
मेटाच्या मालकीची सोशल मीडिया प्लॅटफॉर्म व्हाॅट्सअ‍ॅपने एप्रिल 2023 मध्ये भारतात 74 लाखांहून अधिक खात्यांवर बंदी घातली. माहिती तंत्रज्ञान (IT) नियम 2021 नुसार प्रकाशित झालेल्या मासिक अहवालात कंपनीने ही माहिती दिली आहे. या अहवालात 1 एप्रिल ते 30 एप्रिल 2023 या कालावधीतील डेटा समाविष्ट आहे.
या कारणांमुळे खाती बंद
भारतातील वापरकर्त्यांकडून आलेल्या तक्रारींच्या अनुषंगाने व्हाॅट्सअ‍ॅपने खाती बंद केली आहेत. याशिवाय नियम आणि सेवा अटींचे उल्लंघन तसेच तक्रार अपील समिती (GAC) कडून मिळालेल्या आदेशानुसारही व्हाॅट्सअ‍ॅपने काही खात्यांवर कारवाई केली आहे.
युजरच्या तक्रारीनंतरच अकाउंट बॅन
व्हाॅट्सअ‍ॅपने 1 ते 30 एप्रिल दरम्यान 74 लाखांहून अधिक खाती बंद केली आहेत. सहसा युजरच्या तक्रारीनंतरच अकाउंट बॅन करते. पण यावेळी प्रकरण वेगळे आहे. गैरव्यवहार करणाऱ्या 74 लाख खात्यांवर बंदी घातल्याचे व्हाॅट्सअ‍ॅपने म्हटले आहे. व्हाॅट्सअ‍ॅपने युजरचा रिपोर्ट मिळण्यापूर्वीच 25 लाख खाती बॅन केली आहेत. वापरकर्त्यांना ऑडिओ/व्हिडिओ कॉल करून फसवले जात असल्याचे समोर आले आहे. त्यामुळे व्हाॅट्सअ‍ॅपने मोठी कारवाई करत या 25 लाख खात्यांवर बंदी घातली आहे.
व्हाॅट्सअ‍ॅपच्या माध्यमातून फसवणूक
भारत सरकारच्या आयटी मंत्रालयानेही व्हाॅट्सअ‍ॅपला नोटीस पाठवण्याची धमकी दिली होती. यापूर्वी व्हाॅट्सअ‍ॅपनेच्या माध्यमातून व्हिडीओ आणि ऑडिओ कॉल करून लोकांची फसवणूक केली जात असून त्यांच्या बँक खात्यातून पैसे उकळले जात आहेत. भारतीय नियम आणि व्हाॅट्सअ‍ॅपच्या सेवा अटींचे उल्लंघन केल्यामुळे या खात्यांवर बंदी घालण्यात येत असल्याचे व्हाॅट्सअ‍ॅपने म्हटले आहे. व्हाॅट्सअ‍ॅपची मूळ कंपनी मेटाने एप्रिलमध्ये इंस्टावरून 27 दशलक्ष सामग्री काढून टाकल्या, फेसबुकने 5 दशलक्षाहून अधिक पोस्ट काढून टाकल्या. एप्रिल महिन्यात सोशल मीडियाच्या बाबतीत मेटाने ही मोठी कारवाई केली आहे.
